Mei Nochber isch en reachter Ma,
dea ka me immer braucha,
der langt au an was technisch’s na,
mi tät dees eher schlaucha.

Mei Nochber hot e Eisabah,
do tuat sich fei was rega,
auf d’Berg nauf ond in d’Täler na
siehscht Interregios fega.

Er baschtelt tägweis ond bei Nacht,
die Ehepflicht tuat klemma
ond wenn sei Weib no jünger wär
tät sia en Hausfreind nemma…

Ziehts durch dia Tür, haut’s d’Sichrung naus,
mei Nochber ischt zur Stelle,
i brauch koin Handwerker im Haus
beim Ma für alle Fälle…

Mei Nochber isch en g’scheitr Ma,
koscht froga, was de witt,
bloß gohts mol an was schriftlichs na,
noch isch er it so fit.

Letzschtens, do honds vom Strom mir g’hätt,
noch sait mei Nochber noch,
dass er so wenig zahla tät
und hätt 5 Zimmer doch!

I hon bloß zwoi, zahl 60 Mark,
mei Nochber zahlt bloß dreißig,
„dees ka scho sei, i koch it stark“
sait er „ond Du kochscht fleißig!“

Er mach kaum Licht und wasch vo Hand,
schalts Ferseha kaum ei,
spielt Deutschland gega Engeland
noch glotzt’r bei mir nei.

„Dees gaits doch it“, sag i zuletzt,
s’isch no nia dageweasa,
noch send mir in de Keller g’wetzt,
hond d’Zähler abgeleasa
(weil i auf seiner Rechnung fand,
mir hond de gleiche Zählerstand!)

Noch hot’r g’sait: „Jo do flagg na,
jetz bin i fei blamiert,
i seh’s jo auf dem Zähler da, i hon Dein Stand notiert!“

Kommentare sind geschlossen.